‘धमाल’ फ्रेन्चाइजको १९ वर्षे यात्रा : रेटिंगमा झन् झन् पहिराे, तर हलमा दर्शकको ओइरो

काठमाडौँ — बलिउडमा निकै रुचाइएको चर्चित कमेडी फ्रेन्चाइज ‘धमाल’ को चौथो संस्करण ‘धमाल ४’ शुक्रबारदेखि विश्वव्यापी प्रदर्शनमा आएको छ । निर्देशक इन्द्रकुमारको निर्देशन रहेको यस फिल्मले बक्सअफिसमा कमाईको आक्रामक सुरुवात गरे पनि सञ्चारमाध्यम र समीक्षकहरूबाट भने मिश्रित प्रतिक्रिया पाएको छ ।

अजय देवगन, अरशद वारसी, रितेश देशमुख, सञ्जय मिश्रा, जाभेद जाफेरी जस्ता हस्ती कलाकारहरूको मुख्य अभिनय रहेको ‘धमाल ४’ ले पनि यसको सिरिजको मुख्य कथा खजानाको खोजीलाई पुरानै फर्मुला शैलीमा प्रस्तुत गरेको छ ।

समीक्षकहरूको कमजोर रेटिङका बावजुद पनि दर्शकहरू फिल्म हेर्न हलमा ओइरिएका छन् । ट्रेड एनालिस्टहरूका अनुसार फिल्मले घरेलु र अन्तर्राष्ट्रिय बजार दुवैमा सुखद ओपनिङ गरेको छ ।

प्रदर्शनको पहिलो दिन शुक्रबार भारतमा मात्रै ‘धमाल ४’ ले १३ करोड ७५ लाख भारुको नेट कलेक्सन गरेको छ । विश्वव्यापी ग्रस कलेक्सन भने करिब साढे २१ करोड भारु रहेको बताइएको छ । फिल्मले पहिलो दिनको तुलनामा शनिबार ६० प्रतिशतले उछाल लिएको छ । घरेलु बक्सअफिसमा मात्रै फिल्मले शनिबार साढे २२ करोड भारु कमाएको छ । दुई दिनमै ‘धमाल ४’ ले ५३ करोड ८० लाख भारुको विश्वव्यापी ग्रस कलेक्सन गरिसकेको बताईन्छ । व्यापार विश्लेषक तरन आदर्शले ‘धमाल ४’ ले मल्टिप्लेक्सदेखि सिंगल स्क्रिन र साना सहरहरूमा समेत आक्रामक व्यापार गरिरहेको छ । उनका अनुसार, फिल्मले पहिलो सप्ताहन्तसम्म १ सय करोडको कोशेढुंगा पार गर्ने देखिन्छ ।